Accumulator輸得甘

噚日最大單新聞，應該係中信泰富（267）炒Accumulator。呢種衍生工具，專輸大戶錢，唔係點得黎「I'll kill you later」呢個朵。噚日有朋友問敏妮，究竟Accumulator點玩？點解會輸得咁甘？

敏妮唔敢拋書包，但正如Mr.B講，當你要解釋件事畀人知，自己就會了解多一，敏妮即管試下簡單拆解Accumulator，拋磚引玉等其他真正專家指點。

遊戲開始難脫身

其實Accumulator，就好似一場買賣蘋果遊戲，玩之前首先要定玩幾耐，玩100日、1年、3年都得，不過要記住，定時限之後，除非gameover，否則你幾唔願意都要玩落去。第二樣就係你每日或者每個月要買幾多個蘋果，假設你應承每日買100個，又係句，定左就冇得改。

跟住就要定兩個價，分別係gameover價同接貨價。顧名思義，gameover價係當個蘋果賣到呢個價時，遊戲就會即刻終止。假設家陣一個蘋果賣10蚊，gameover價會貴過10蚊，假設係15蚊。只要個蘋果一日賣平過15蚊，遊戲都要繼續！

接貨價就係你每日可以用呢個價買100個蘋果，直至時限到或者gameover為止。呢個價會低過10蚊，假設係5蚊。記住，一旦玩呢個遊戲，就算街市每個蘋果賣到5毫子個，你都要每日用5蚊，買100個蘋果，直至gameover。

估錯焗住高價接貨

講到呢度，你應該知Accumulator點解會令人輸得咁甘。甘係你買時候一定唔會預計到5蚊個蘋果，會有一日賣到5毫子個。第二甘係，一旦開始個遊戲，即使蘋果跌到唔值5蚊，你每日都要焗住用每個5蚊買100個。冇錯，你係可以放雪櫃等蘋果賣番5蚊時候，拎出去賣，但一日買100個返，你要用幾多錢？你認為你可以等幾耐？

呢個遊戲面，蘋果可以係中移動（941），又可以好似中信泰富咁，係澳元、歐元。睇中信通告，家陣街市賣緊7毫子一個蘋果，但佢就要用8毫7仙買。

Accumulator輸得死人，當然唔只咁簡單，而且咁多有錢人玩，自然有佢吸引力，下次再講。

溫敏妮