大戶絕招：神又係佢鬼又係佢

　　一直想有系統地寫寫大戶殺散戶招數，但涉及題材太多，未能動筆。但網友阿風問起，又覺得可以先談談，或者等將來把這裏的內容整理成書，才理出一個系統吧。

　　我一開始就話，股市有很多幕後大佬，設定老鼠籠，請君入籠。幕後大佬精研群眾心理，用最高超的手法引你入籠，各行各業也有竅妙，我就是想帶大家窺探股市大佬行事的「竅炒」。

　　我將股市大佬分兩類，鬼佬和土佬，鬼子大佬食大茶飯，主宰大市的上落方向，土炮大佬主要玩個別股份，炒過不亦樂乎。亦有界乎兩者中間的鬼子大行，已經變成半個土炮，在本地搞衍生工具，恒常吸水。

　　先講鬼子大佬。你知我鐘意講故事，先從９８年政府入市的故事講起。９８年鬼子大軍襲港，全球最狠的對沖基金雲集香港，最厲害的是索羅斯的老虎基金和一個外號「餓狼」的對沖基金集團（事後曾接受鬼佬雜誌訪問，得此渾號），它們要食大大大茶飯，想一舉擊潰港元聯系匯率和攻散股市，想賺數以百億計美金。

　　香港政府好像一個童子軍那樣入市，和大鱷博棋，而家稔起都好得人驚，事關開始時政府只打算入貨１００、２００億港元股票，後來鬼佬借貨狂沽，政府接貨１０００億，聞說接到最後一日，金管局任總落車時真係腳軟。

　　那時香港政府對抗鬼佬大軍，入市全部搵華資行操盤，惹起鬼佬不滿，聞說當時美國財長魯賓，直接打電話俾特首老董，話香港政府入市不找鬼佬行，歧視佢地咁話。這個故事第一個教訓，就係鬼佬大證券行幕後有政府撐腰，你話勁唔勁。香港政府當然無就範，因為入市操盤者得悉政府的機密，當時要和鬼佬開戰，自然不想找鬼佬經紀行了。

　　結果香港政府入市贏錢，鬼佬對沖基金有無輸到仆呢？又唔係好覺老虎基金輸大錢喎。關鍵在什麼，我相信是「轉身」，鬼佬好快就轉咗身，由做淡變做好。這是第二個教訓，亦是最重要的教訓，大市上落，做好做淡都是大戶，神又係佢，鬼又係佢。

　　我最記得當日政府入市前，恒指低見５８００點，當時還有一本以數字為名的週刊，以封面故事大唱恒指會見３０００點，即係話仲要跌一半，放這些消息的人，若無特殊動機，就是見好唱好見淡唱淡跟風之輩，你信佢就入籠啦。

　　政府入市後，兩年之間，股市由恒指低位５８００點，升上１８０００點的歷史高位。我有一個理論，以當時的經濟條件，跌到５８００點不合理，升到１８０００點同樣不合理，股市這樣喪升，有兩個原因，第一，政府大量持貨，不正常地收乾了股市的貨源，令供求失衡而急升。第二，對沖基金在７０００點左右反手造好，推波助瀾，挾升港股。所以鬼佬大戶使遇上不按常理出牌的香港政府，被挾在當下，也能即時轉身，一路媽你入市破壞市場規律，唱你入市唔掂，等人以為政府頂一陣就頂唔順，一路暗中卻反手做好，齊行同你一齊玩上去，這是第三個教訓，鬼佬大戶咁古惑，言行不一，一眾散戶點夠佢玩！

　　其後陸羽仁找了一個當日直接參與入市的高官，問他知唔知對沖基金是否反手造好，他的答案是「完全有可能」。

　　９８年一役，暴露了鬼子大戶的各種招數，陸羽仁近觀兩軍搏殺，都學到唔少野。明白這些大戶招數，往後分析大戶入市動向，都八九不離十矣。

陸羽仁