債券大王「股神孖Q兼備」

經濟不景氣蔓延全球，企業渣fit人要殺出重圍，單靠IQ（智力商數）、EQ（情緒智商）同AQ（逆境商數）已經唔多夠，債券大王格羅斯近日發表最新投資展望時提到，企業頭頭要在金融海嘯中突圍而出，最重要係有CQ──唔係CreativeQuotient（創意商數），而係CommonSenseQuotient（常識商數）。

 

常識商數幫你突圍

格羅斯自問都係叻仔，但佢心目中，事業上成功唔係因為IQ過人，最緊要係有CQ。佢解釋CQ唔單止幫助吸收資訊，更重要係可以幫人分析，抱懷疑態度去認識呢個世界。有CQ人會問：「究竟呢件事係咪makesense？」如果唔係，「有乜要改？幾時改？」

格羅斯識英雄重英雄，佢讚股神畢菲特同時兼備IQ同CQ，股神名句「潮水退後，才知道誰在裸泳」，就充份反映佢呢兩Q功力。當海水仍然高漲，全世界陶醉永無休止的夏日時，醒目投資者都要小心準備、著好泳衣，唔好輕言裸泳。